يارب انصر غزة

اللهم ألهم اهل غزة الصبر على البلاء
اللهم اهدم اسرائيل
اللهم سلط عليهم عبادك المخلصين
اللهم اظهر لنا عبادك المخلصين
اللهم احرق كل خائن فى الدنيا والآخرة
اللهم احرق كل متواطئ فى الدنيا والآخرة
اللهم انزل لعنتك على من لهاه حب الدنيا عن نصرة المظلوم
اللهم انزل لعنتك على من استطاع ولم يفعل
على من رأى الظلم ولم يحرك ساكنا
اللهم الهمنا الطريق القويم
اللهم دمر من سولت له نفسه الاستفادة من نكبة اهل غزة
اللهم ابدل المسلمين قلوبا غير القلوب الواهنة
اللهم لا تحكم علينا احمق او خائن او عميل او صاحب مصلحة او منافق يا رب العالمين

لعبة ضرب بوش بالجزمة

ودى لعبة تانية
يلا نضرب بوش بالجزمه
بردو عقبال إللى فى بالى

عقبال إللي في بالي

ابو حصيرة

هى البلد مبقاش ليها كرامة ليه كده يعنى فى خلال السنتين اللى عدوا
حر ق 2 مصريين فى نقطة شرطة فى الكويت
ظهور فيلم وثائقى اسرائيلى يحتوى على اعترافات لمسئولين اسرائيليين بقتل الأسرى المصريين
خفر السواحل الليبى يغرق مراكب الصيادين المصريين
أمريكى يقتل مصرى من فوق بارجة امريكية فى قناة السويس
جلد الأطباء المصريين فى السعوديه
تفتيش البابا شنوده فى انجلترا
سب الرئيس المصرى فى الكنيست الاسرائيلى
واخرتها استباحة الاراضى المصرية كل عام من قبل اليهود بمناسبة مولد ابو حصيرة
انا اقترح توفيرا للنفقات نلغى وزارة الخارجية واذا كان على الكلمتين بتوع كسر رجل الفلسطينيين اللى هيدخلوا اض الوطن العزيز الغالى ممكن نخلى العادلى يقولهم وبلاها بقى كمان كلية سياسة واقتصاد أصل ايه لازمتها هما كلمتين اى عيل صغير ممكن يحفظهم ويسمعهم
"العلاقات المصرية بالدولة المذكورة لا تفريط فيها ولن نسمح لحوادث فردية بالتأثير على العلاقة بين البلدين"بس تقول الكلمتين دول وتبص الناحية التانية وتنحنى .ـ

غدرونى

كلنا سوا فرقة سوريه مميزه جدا تقدم موسيقى مختلفة وكلمات أكثر من رائعة وقد اصدروا البوم بعنوان كلنا سوا عام 2001 والألبوم الثانى عام 2003 تحت اسم موزاييك لكن كل ده مش مهم
المهم فعلا هو ان فى اغنيه لكلنا سوا بقت هى الخلفيه بتاعت حياتى كلها انهارده ، اسم الأغنيه غدرونى من كلمات والحان : إياد الريماوي
غدروني .. غدروني

.. قالو بتدرس و بتتخرج

.. ساعتها شوف و اتفرج

عالسعادة .. و عالمصاري

غدروني

فكرة او قول فكرتين

لماذا لا تنشأ الاذاعة المصرية موقعا على الانترنت تضع عليه تراث الاذاعة المصرية للرائع مثل الاغانى القديمة والاوبريت والمسلسلات الاذاعية الرائعة مثل ليلة القبض على فاطمة والف ليله وليله وده هيكون دعاية جيده للاذاعة المصرية وهيكون مصدر دخل من الاعلانات على الموقع وكذلك هيزيد الاعلانات فى الاذاعة نفسها
الفكره التانية قريبه جدا من الاولى من الاخر مكتبة الاسره بدأت من 15 سنه ممكن ينشروا منها نسخة على الانترنت ولو متاخره بخمس سنين يعنى مثلا فى 2008 يتنشر اعمال 2003 وده هيكون ذو اثر طيب فى نشر المعرفه

عشان خاطرك يا عم وليد

رواية عزازيل

عودة الوعى

ان كتاب عودة الوعى يعطى تفسيرات واضحة لكل احداث الفترة الناصرية ويلقى بظلال قاتمة على النفس لأن الأثار التخريبية لهذه الفتره ماتزال مستمره

اخوات اوباما

طبعا كلنا شفنا الرئيس الامريكى الجديد باراك اوباما اول رئيس أمريكى من اصول أفريقية بس الصراحة محدش دقق فى اصله خالص ، الراجل ابوه كان من كينيا اسمه حسين ومسلم عرف امه فى سنة 60 واتجوزها اول فبراير 1961 وخلفوا الواد اول اغسطس 1961 وبعد كده انفصل عن امه سنة 63 واطلقوا نهائيا سنة 64 وعاش اوباما مع امه.... وابوه رجع كينيا ومن 64 لحد 1982 حسين ماشافش ابنه غير مرة واحده يعنى اوباما مش اسود ولا حاجة ده لون بشرته كده بس لكن ماشافش حياة السود ولا عاش وسط السود ، بس مش ده المهم ، المهم هو حسين اوباما(الأب) بعد مارجع كينيا اتجوز وخلف ولا لأ ماحدش جاب سيره، لو الراجل ده اتجوز وخلف أحمد مثلا يبقى المواطن الكينى المقهور أحمد اوباما الأخ غير الشقيق لرئيس أكبر دوله فى العالم ...... والله هتبقى حاجة مسخرة.ـ

ايه اكتر حاجة مزعلاك من الاسلامجية

انا أكتر حاجة قارفانى من الاسلامجية هى عدم قبولهم بالآخر .... لكن هو فى مشكله بتواجهنى ما باقى الناس برضو مش قابلين بأى اخر!!!
كل واحد بيدعى ان عنده الحقيقة المطلقة ، واصلها بالفكاكة كده اصل هى الحقيقة واضحة؟! المشكله فى عينين الاخرين اللى مش قادرين يشوفوا الحقيقة نظرا للتعليم الفاشل ونظرية المؤامرة.
ياعينى على نظرية المؤامرة .... للدقة هى مش نظرية واحده فى النظرية الكلاسيكية "التى تقول بأن الغرب يخشى نهضة الخلافة ويحارب الاسلام او ان الغرب يساعد اسرائيل لإذلال المسلمين واعاقتهم عن التطور المأمول" ، لكن الصراحة النظرية الحديثة اشد بكتير ............. "نظرية الغزو الوهابى لمصر يعينى على الدماغ الرايقة ومن هذا المنطلق يكون الاخوان وهابيون والقرضاوى وهابى والموظفين الغلابة الذين قضوا اغلب عمرهم فى الخليج ايضا عملاء للتنظيمات الوهابية "..... نياهاهاهاه
الصراحة الاسلامجية باختلاف انواعهم وتصنيفاتهم تحس انهم عاوزين يكسبوا ارض فى الشارع بيخاطب حد بصرف النظر بيخاطبوا صح او غلط لكن اصحاب النظرية الحديثة دول ماتعرفلهمش هما عاوزين ايه ؟!! انت حاليا بتقول ان الشعب متساق زى الخروف ورا الوهابيين ولاد ال ..... وان الشعب غبى وحمار طب مادام انت محتقر الناس للدرجة دى قاعد بتجيب فى سيرتهم ليه يا واطى بتناحة أهلك دى ماتسيبنا فى مصايبنا .
وللحديث بقية

الوطن؟

ما هو الوطن ؟ الارض ؟ التلال الجرداء ؟ العيون القاسية التى ينصهر منها الحقد والرصاص وكلمات السخرية ؟ الوطن ان يجوع الانسان ؟ أن يتيه فى الشوارع يبحث عن عمل ووراءة المخبرون ؟
ما أقسى تلك الايام . لكن لم يبقى منها إلا ساعات وتنتهى ! إذا وقف القطار فى المحطة الأخيرة ، يجب ان أجبر نفسى ان أبول هناك . لا أريد ان احمل شيئا معى. حتى تلك الذكريات البائسة التى تنطبع على وجهى، على ملابسى ، اريد ان اتركها . أريد ان أكون انساناَ جديداَ ، لا علاقة له بهذه الأرض .ـ
الوطن ! تصور هذه الكلمة كم هى كبيرة وخطيرة . الوطن كما أصبحت مقتنعاَ ، وبعد تجربة مريرة دامت أكثر من عشرين سنة ، الوطن المكان الذى يعمل فيه الانسان ، بين الرجال الذين يعرفهم ويحبهم ، لقد أصبحت واقعياَ . زالت من ذاكرتى الأفكار الحالمة .لم أعد أفهم الأشياء كما كانت تقال ، أصبحت لها دلالات صلبة ، حارة ، ومن أجلها يمكن أن احارب .ـ

عبد الرحمن منيف - رواية الأشجار

انا قريت رواية عزازيل

هى جامده جدا كان نفسى انقل منها مقاطع بس مش عايز احرق منها حاجة
اللى عنده وقت الرواية ممتعة جدا

ازمة القرضاوى....ازمة المثقفين فى مصر

تخيل لو ان القرضاوى استبدل تصريحاته النارية ضد الشيعة بتصريحات نارية ضد السلفيين كان حصل حاجة ....ـ.. 

ولا اى حاجة اخرها محمد حسين يعقوب وابو اسحاق هيخبطوا فيه فى برنامج ولا اتنين وانتهينا على كده .ـ

مما يدل بشده على ان الشيعة اقرب لأهل السنة من السلفيين انا مش عارف ايه سر الحب ده وهل هو حب متبادل ولا من طرف واحد يعنى الرقاصة بتحب البلطجى وهو مش معبرها فمشفناش يعنى الكتاب الشيعين ولا الاعلام الشيعى بيقول ان السنة دول مسلمين زيهم زينا ولا السيستانى طلع وقال لا يوجد خلافات جوهرية بيننا وبين السنة زى ما شيخ الازهر الهمام قال .ـ

وبالحق صحيح هو فين حرية الرأى اللى بنتكلم عليها ولا هى حرية الرأى المقصوده هى حرية نوال السعداوى و سيد القمنى وباقى الاشكال ال......ـ لكن القرضاوى ملوش فيها ولازم يقول اللى احنا عاوزينه يقوله ولا يبقى الشيخ ارهابى

واخيرا هو ليه كل الناس  بتفسر كلام الشيخ ومحدش رد عليه 

   ـ هل فعلا الشيعة بيقولوا ان القرآن ناقص سورة هى سورة الولاية

ـ هل الشيعة عندهم سنة سيدنا محمد والاحد عشر معصومون

ـ هل بيلعنوا سيدنا ابو بكر وسيدنا عمر وبيقولوا الصحابة خانوا النبى

ـ هل النقط اللى فاتت دى كلها لاتمثل مشكله بينك  كسنى وبين الشيعة

ـ انا عايز بلد واحدة فى الدنيا بحالها فيها اقلية شيعية ومش عاملين مشاكل

رواية عزازيل

الرواية شكلها جامد اوى 

عرفت السر عرفت السر

الحكومه دى مجوووووووس

قطيعة ماحدش بياكلها ........................ خالص غير احمد عز الدخيلة

طاغيا باغيا

لم يكن شيئا ثم ارتقى الى ان اصبح شيئا مذكورا . وقد سلك فى تصعيده من الحضيض الى القمة طريقا وعره ملتوية ،
يغمرها ضوء الشمس المشرقة المحرقة احيانا، وتنظر اليها الشمس من وراء نقاب من السحاب احيانا اخرى، ويحجبها ظلام قاتم فاحم فى كثير من اجزائها . فلما ارتقى الى القمة واطمأن فى مكانه منها، نسى ماضيه كله، واعرض عن مستقبله كله ،وعاش ليومه الذى هو فيه.ـ نسى الماضى، فلم يتعظ ، وأعرض عن المستقبل، فلم يتحفظ، ومضى مع هواه طاغيا باغيا ، حتى اخاف الناس من نفسه ، واخاف نفسه من الناس ، فلم يأمن الى احد ، ولم يأمن اليه احد. واذا هو مضطر لاظهار الحب لقوم يبغضهم اشد البغض، واذا الناس من حوله مضطرون لأن يظهروا له حبا متهالكا، ويضمروا له بغضا مهلكا، واذا الاسباب بينه وبين الناس ترث، حتى ان ايسر الامر لينتهى بها الى الانقطاع.ـ

من كتاب جنة الشوك لطه حسين بس من غير الصورة

نفسى يعملوا توك شو جديد يقدمه جمال البنا ونوال السعداوى مع بعض

بصرف النظر عن مدى جدية الهلاوس اللى خارجة من عقول - اشكك فى وجودها -نوال السعداوى وجمال البنا الا ان الجوز يعتبروا شخصيات مميزه جدا فى الحقيقة انا مشتفلهمش اراء مثيرة للجدل يعنى هو غالبا الجدل اللى بيحصل بيكون حوالين ازاى نسيب ناس زى دى تتكلم والطرف التانى بيرد بعدم الحجر على الاراء وانا شخصيا مع اننا نفرد لهم اكبر مساحة ممكنه ونمنع اى حد يعترض عليهم وده طبعا هيتسبب فى انخفاض عدد السكان نظرا لانخفاض الخصوبة عند الرجال والنساء بجانب حالات انفجار المرارة التى ستؤدى الى حالات وفاه نظرا لعدم قدرة المستشفيات على قبول حالات جديدة بجانب الذين سيموتون من شدة الضحك.ـ طيب احنا لو عملنا توك شو لنوال السعداوى والبنا ده هيبقى جميل جدا ونحط قبله تحذير عشان الاطفال والمشاهدين مرهفى الحس ممكن نستفيد منه جدا ده هيسمحلنا بتوقيع عقوبات جديدة يعنى واحد زى الشيخ يوسف البدرى نحكم ليه يبقى ضيف دائم لمدة سنه مثلا وابطال وصناع مسلسلات رمضان وكمان فى المعتقلات هيوقفوا التعذيب الجسدى وهيفرجوا المعتقلين ع البرنامج هما حلقتين والواد هيقول كل حاجة ويعرفها وان مقالش يبقى فعلا ما يعرفش حاجة ده لو مين مايستحملش دى حاجة فعلا فوق طاقة البشر.ـ

طاغيا باغيا

لم يكن شيئا ثم ارتقى الى ان اصبح شيئا مذكورا . وقد سلك فى تصعيده من الحضيض الى القمة طريقا وعره ملتوية ،
يغمرها ضوء الشمس المشرقة المحرقة احيانا، وتنظر اليها الشمس من وراء نقاب من السحاب احيانا اخرى، ويحجبها ظلام قاتم فاحم فى كثير من اجزائها . فلما ارتقى الى القمة واطمأن فى مكانه منها، نسى ماضيه كله، واعرض عن مستقبله كله ،وعاش ليومه الذى هو فيه.ـ نسى الماضى، فلم يتعظ ، وأعرض عن المستقبل، فلم يتحفظ، ومضى مع هواه طاغيا باغيا ، حتى اخاف الناس من نفسه ، واخاف نفسه من الناس ، فلم يأمن الى احد ، ولم يأمن اليه احد. واذا هو مضطر لاظهار الحب لقوم يبغضهم اشد البغض، واذا الناس من حوله مضطرون لأن يظهروا له حبا متهالكا، ويضمروا له بغضا مهلكا، واذا الاسباب بينه وبين الناس ترث، حتى ان ايسر الامر لينتهى بها الى الانقطاع.ـ

من كتاب جنة الشوك لطه حسين بس من غير الصورة

هو هشام طلعت مصطفى أهبل مثلا

نشر فى جريدهة الاهرام يوم الاربعاء بتاريخ 3 سبتمبر 2008 خبر بعنوان

إحالة هشام طلعت مصطفي لمحكمة الجنايات بتهمة
التحريض علي قتل سوزان تميم
رجل الأعمال دفع مليوني دولار لضابط سابق
لتنفيذ الجريمة في دبي

الواقعة غريبة جدا والكلام مش راكب على بعضه خصوصا بعد قرار النائب العام بعدم النشر الغير مبرر واللى ملى البلد اشاعات عن هشام طلعت انه متورط فى جريمة قتل المطربة اللبنانية وبعد كده الاهرام جريدة الحكومة تكتب مقال بهذا الكم من التشفى فى هشام ده يعتبر غريب جدا ويشكك فى نوايا الحزب الحاكم تجاه هشام طلعت .ـ
لو كانت الحكومة فعلا فى ضهرهشام كان اسهل شئ يسفروه قبل رفع الحصانه وموضوع ممدوح اسماعيل مش بعيد ثم اصلا وقت حدوث الجريمة هشام طلعت كان فى سويسرا بصرف النظر عن اشكالية ايه اللى رجعه قبل ما يطمئن لهدوء الاحوال فى مصر ليه مادام الوضع خطر ماكانوش سابوه اعد هناك لوكان فيها حرج على الحكومة المصرية !!!ـ
بالنسبة لتفاصيل الجريمة المنشوره فى الاهرام كذلك على غير العادة المتهم الاصلى فى القضية محسن السكرى كان ظابط امن دوله سابق ثم نقل لمديرية امن القاهرة وبعد كده اشتغل فى شركات هشام طلعت وسابه وراح اشتغل مع ساويرس فى العراق واتخطف وساويرس دفع 30 الف دولار فدية ليه بعد كده اتفق مع المنظمات العراقية عل خطف 3 موظفين من الشركه دفع فيهم ساويرس 3 مليون دولار واخذ هو نصفهم ومع تزايد هذه الامور تم فصله من الشركه اظن ان كل هذه المعلومات ان دلت على شئ فهو بالتأكيد ان هذا الرجل لا يمكن ان يكون ساذجا بأى مقياس من المقاييس.ـ
ورغم ذلك باقى التفاصيل على العكس تظهره كأنه اهبل او بلا عقل اطلاقا
* أقام فى الفندق المجاور لمنزل سوزان تميم فى دبى
* اشترى حذاء رياضى وملابس وسكينه - أداة الجريمة - من محلات مجاوره بالفيزا كارد التى تحمل كل معلوماته الحقيقية
* وبعدين بيقولك وصل فريق امنى من الامارات معاهم الادله وشريط فيديو يتضمن حركة المتهم محسن السكري سواء داخل الفندق ونزوله منه وفي يده الكيس وتوجهه إلي منزل المطربة‏,‏ وطرقه علي بابها ثم عملية الدخول والخروج من الشقة وصعوده إلي الطابق العلوي وإلقاء الملابس التي كان يرتديها وقت الحادث‏,‏ ثم نزوله ودخوله الفندق في الحادية عشرة مساء يوم‏28‏ يوليو‏,‏ ومغادرته في اليوم التالي اضافة إلي سفره.ـ
ده كان فيلم مقتل سوزان تميم بقى
واخيرا مكالمة التليفون المريبة اللى اتكلمت عنها الاهرام بين رجل الاعمال الغير امارتى - مصرى مثلا ولا ايه - اللى كلم رجل اعمال اماراتى وبلغه باسم مرتكب الجريمة ياخى .......ولا احنا فى رمضان .ـ
عموما انا من كل اللى فات استخلصت حاجة واحدة هى ان ماجرى اكبر مما نرى .ـ

الريس سأل أحمد نظيف

الريس سأل احمد نظيف هو لو مكانش مشرف استقال كان مين اللى هيقيله ؟
قاله البرلمان يا ريس
رد الريس احرقوه

بهدوء

امبارح رحت اغسل ودانى من الشمع الدكتور سألنى انهى ودن اللى فيها المشكله قلتله الاتنين بص فى الشمال قال الله من الممدوده قوى دى وبعد كده بص فى اليمين قاللى وكنت عاوز تسمع حاجة وراح جاب ميه سخنه وبتاع شكله غريب كده شبه المسدس وطاخ طاخ راح مخرج عمود شمع من ودنى بس لقيت دوشه حواليه اصوات كلاكسات عالية اوى وستات يتزغرد والناس بتتكلم بصوت عالى انا ماكنتش سامع اى حاجة من العك ده الشارع كان بالنسبة لى مكان هادى جدا المهم قبل ما افوق من ذهولى كان حط المسدس فى الودن التانية وطاخ طوخ طاخ راح مخرج عمود اكبر من الاولانى سألنى ها يا عم سامع قلتله هو الشارع صوته كده على طول قاللى ده انت هتندم اليومين اللى جايين ع النعمة اللى كنت فيها بس نزلت مش قادر استحمل صوت الكلاكسات وعلى ما وصلت البيت كنت صدعت فضلت قاعد قدام الكمبيوتر لحد الساعة 3 ع التوقيت القديم يعنى 2 ع التوقيت الجديد وبعد كده قمت نمت وفجأة سمعت صوت عالى اوى بيأذن للفجر قلت ياه هو انا بقيت مؤمن للدرجه دى انام قبل الفجر بساعتين ومع ذلك اصحى الحمد لله بس فكرت لقيت ان ودنى هى اللى بقت مؤمنه واتعدلت وكملت نوم لكن المؤذن كان لسه فى اشهد ان لا اله الا الله بردو فضلت مكسل ومش عايز اقوم اصلى لحد ما الأذان خلص وكسلى قعد يزغرد من الفرحة لكن ماعرفش فجأه سمعت صوت ديك عملاق قعد يدن لما خرم ودنى وفى الأخر لقيت النوم حلم مستحيل قمت صليت المشكله ان على ماأذكر قبل ما اغسل ودانى ماكنتش كده انا مش قادر استحمل صوت الميه وهى نازلة من الحنفية ولا صوت صوابعى على الكيبورد يلا بس الحمد لله مصلحة انى صليت الفجربس بجد انا خايف من المواجهة من باقى اليوم

الرئيس مبارك : الرمز ، والأسطورة ، والزمن الجميل

محدش يستغرب من العنوان ده! الرئيس مبارك رمز فعلا رمز ومهم كمان ؛ فالرئيس بقى بيرمز فى حياتنا للصفر 0 وكل الأرقام الى تحت الصفر ... السالبة يعنى وماتفتكرش ان دى حاجة قليلة ده الاغريق داخوا عشان يثبتوا ان الأرقام لانهائية والرئيس أثبت لنا ان كل حاجة مالهاش نهاية بس من تحت .ـ

بالنسبة للاسطورة فدى محدش يقدر ينكرها ؛ فالرئيس مبارك سيدخل موسوعة الأرقام القياسية من اوسع أبوابها طبعا بصفته الحاكم اللى قعد أكبر مدة زمنية فى العصر الحديث يحكم مصر بس هو مستنى يكسر الرقم بتاع محمد على 1805 - 1848 يعنى قاعد بتاع عشرين سنة كمان ومين يعرف ؟!! يمكن يطول عن كدة واديها كمان قياسية .
وأخيراً الزمن الجميل ! حريق القاهرة - الأوبئة - عودة الاقطاع - التعامل مع العدو - انتشار الفساد - انفصال السلطة عن الشعب - الخوف من البوليس - احتلال البلاد .
أوعى حد يفتكر أن الفترة دى هتعدى زى عصور الاضمحلال اللى قبل كدة ، الصفحة دى هتفضل منورة فى كل كتب التاريخ وفى كتب الفوازير والالغاز . أى حد بيسأل على أسوأ أى حاجة هتكون مصر هى الاختيار دائما

وعجبى

الحكاية دى فكرتنى بممدوح اسماعيل

شخص من مماليك السلطان الجلبان قصد يشترى قمحا من مركب على شاطئ البحر فلما اشترى ذلك القمح لم يجد تراسا يحمله فوجد شخصا من الفلاحين الصعايده ومعه حمار وزكيبة فاخذ المملوك الحمار والزكيبة لكن الرجل رفض ان يعطيه الحمار فضربه على راسه ضربا مبرحا حتى سال دمه فالقى الرجل بنفسه فى البحر فاغمى عليه فمات ، فعند ذلك تكاثرت الناس على ذلك المملوك ومسكوه واتوا به الى بيت الامير فوضعه فى الحديد وارسله الى الوالى ليسجنه الى ان يحضر السلطان فلما بلغ خشداشينه -اتباعه او زملائه - ذلك اتوا الى بيت الاميرفوجدوه غائبا فقيل للماليك ان المملوك القاتل تم تسليمه الى الوالى فتوجهوا الى بيت الوالى وخلصوا المملوك الذى قتل الفلاح وقصدوا ان يحرقوا بيت الوالى وينهبوه فتغافل الامير عن قضية القتل وراحت على من راح .ـ

من بدائع الزهور لابن اياس الحنفى

لما الناس مسكوا المملوك ما كانوا يقتلوه ونخلص طالما البلد مافيهاش قانون بالشكل ده وهى طبعا بتفكرنى بقصة ممدوح اسماعيل عشان الكلمة الاخيرة "راحت على من راح "ـ

على الساعة اتنين تلاته الفجر

لو راجع الساعة اتنين ولا تلاته الفجر وادولك اختيار تقابل ظابط ولا حرامى تختار ايه؟
انا شخصيا اختار الحرامى

يارب انجح

يارب انجح وكل الناس اللى تتمنالى الخير واللى نفسهم انجح يارب ينجحوا هما كمان ويارب الناس اللى مابتتمناليش الخير واللى نفسهم مانجحش ينجحوا بردو يعنى هينقصونى حته لما ينجحوا اما الناس اللى انا مش فارق معاهم ونجاحى زى عدمه بالنسبة لهم فيارب ينجحوا كذلك يارب الناس كلها تنجح وانا اكون معاهم

البقاء لله يوسف شاهين مات

الله يرحمه

ملامح من بهاء طاهر

اذا لم تكن ومن محبى بهاء طاهر وممن يعتبرونه واحد من اهم الروائيين العرب - ان لم يكن اهمهم - فعليك اولا أن تعلم إن بهاء طاهر واحد من اهم الروائين العرب - إن لم يكن اهمهم - وثانيا أن لا تكمل هذه المقاله لأنها تهم قراء بهاء طاهر وحدهم
بعد ان انتهيت من قراءة رواية بهاء طاهر "قالت ضحى " وجدت بعض الملامح المشتركة بين كل روايات بهاء طاهر التى قرأتها رأيت ان اوضحها هنا لعلى ازداد فهما او ربما تفتح طريقا لشخص أخر ليفهم

اولا البطل عند بهاء طاهر لا يصنع شيئا تقريبا غارق فى صراعه الداخلى لا يجد منه مفر يجلد نفسه باستمرار وخطيئته دائما واحده هى الخيانة تكرر ذلك فى قالت ضحى وفى شرق النخيل وفى الحب فى المنفى وفى واحة الغروب لا ينطبق هذا على نقطة النور فقط

البطل رغم خطيئته الا انه فى وضع افضل من الاخرين اخلاقيا فاذا كان البطل باع مره تحت ضغط فالأخرين باعوا من اجل المال ومن اجل الحياة الرغده ويبيعون مبادئهم كل يوم وكل ساعة حفاظا على اكل عيشهم

الشخصية الدنيئة عند بهاء طاهر شخصية لزجة وصولية تحمل كل المبادئ الشريره فمثلا وصفى فى واحة الغروب بيقول ان عرابى كان همجى او شئ من هذا القبيل وعبد المجيد فى قالت ضحى يتحدث عن العناصر الهدامه التى يجب اقتلاعها من البلد

لا ينهى بهاء طاهر القصة ابدا بغير توجيه اهانه بشكل او بأخر لهذه الشخصية

ممكن ناخد من النقطتين السابقتين ان بهاء طاهر بيكره الشخصية الدنيئة خاصة اذا اضفنا انها مابتظهرش الا فى اخر كام صفحة من القصة

وان كان يمكن تفسير حكاية اخر كام صفحة دى بانه مش عايز يصور الموضوع على انه صراع بين الخير والشر

مفيش حل للمشكله فى النهاية كأنه بيقولك ان مالهاش حل او انا منتظر الحل مثلك تماما حتى فى واحة الغروب التى قام البطل فيها بعمل شئ مؤثر فعلا فى النهاية لكن لا يمكن اعتبار ذلك حل للمشكله

طبعا كل الكلام ده لا ينطبق على نقطة النور ومن هنا تيجى اهمية خاصة للرواية دى اللى ربنا يستر عليها من ايدين بلال فضل

فغالبا هحاول اقراها تانى قريبا واكتب مقال تانى عن بهاء طاهر - ده الانترنت كله شويه عليه - وربنا يخلى بهاء طاهر ويخليلنا دماغه اللى تستاهل تقلها دهب

مدينتى والغجر

من شعر عبد الوهاب البياتى

مدينتى استباحها الغجر
مدينتى أهلكها الضجر
مدينتى ،القمر
يخاف من بيوتها المنفوخة البطون
يخاف من عيون حاكمها الشرير
الميت الضمير
لكنه يحب فى أحيائها الفقيرة السوداء
صبية عمياء!ـ

*******

مدينتى الحزينة الصماء
تخاف من عيون حاكمها الشرير
الميت الضمير
لكنما القمر يحب فى أحيائها الفقيره السوداء
صبية عمياء
تؤمن بالفجر وبالإنسان
وترفض الإحسان
من عاشق فقير

عبد الوهاب البياتى

وقفة مصرية .....نحكم عقلنا نطرد الحكومة دى من هنا

طبعا كل الناس شافت اللوح دى فى كل الشوارع اول حاجة تلاحظها اننا كشعب مسئولين عن كل اللى بيحصلنا يعنى لو ماكنتوش بهايم وكنتوا بطلتوا خلفة كان زمانكوا لاقيين المية والعيش والشغل والمواصلات كمان
ماعلينا نفترض ان الكلام ده صح ، مش كان فى حملة لتنظيم الأسرة وماما كريمة والنجمة الذهبية وكانوا قارفينا بيها فى التلفزيون المصرى -- ليه بقى الحملة دى فشلت هى مالهاش غير حل من اتنين --- يا إما احنا عالم غجر ومابينفعش معانا نصح وارشاد يبقى كده مفيش أمل ان حكومة نظيف ذات الخطاب الإعلامى المميز هى اللى هتقنعنا بما فشل الاخرون فى اقناعنا به
او--- ان الحملة الأولانية كانت بتستخدم طرق غير مجدية لإقناع الناس وفى الحاله دى قبل الحملة الجديده لازم نعرف هو مين اللى كان مقصر فى الحملة الأولى وتكاليفها مين اللى هيتحملها وياترى ماما كريمة خدت حق كام مولود كان حقهم علينا موجود ونحط خطة واضحة جديدة قدام الناس ونبين ازاى تلافينا اخطاء السنين السابقة
الريس كل خطاب يقول للناس نظموا الأسرة والناس مابتسمعش كلامه طيب بما انه عمل اللى عليه وزياده كتير والناس مانفعش معاها مايسيبنا مادمنا مابنسمعش كلامه يعنى بيكسب الانتخابات بأكتر من 90 % وبعد كده ماحدش بيسمع كلامه يمشى بقى قبل ما السفينة تغرق بسبب غباوة الشعب.
ملحوظة : واحد صاحبى طرح فرضية حلوة قوى قال لو احنا دخلنا كمصريين 100 جنيه الحكومة هتسرق 90 وتوزع علينا 10 جنيه طب لو سمعنا كلام الحكومة وكل واحد قتل واحد تانى فبقينا 40 مليون بس تفتكر ايه اللى هيحصل ولا حاجة الحكومة هتسرق 95

اللى يسمع كلام الجرانين مايعرفش الأفا جايله منين

قبل ما تقرا بص على اللينك ده
http://www.almasry-alyoum.com/article2.aspx?ArticleID=110859
الست المذكوره فى الخبر تبقى جارتنا وبأفضالها وأفضال باقى عيلتها اللى هما مالكى البيت اللى احنا ساكنين فيه أصبح بيتنا يعرف فى الحى كله ببيت المجانين نمشى بقى مع الخبر حته حته ونتفرج على الكدب اللى على أصوله
أولا ماكنتش ربة منزل كانت ممرضة وطول عمرها بتشتغل
ثانيا بيتنا دورين مفيش غيرهم ازاى نطت من الدور الثالث
ثالثا حكاية نفقات الولادة دى غريبة أوى اذا كانت هى ممرضه وشغاله من سنين فى مستشفى هيولدوها جدعنه
رابعا رفضت التحدث مع زوجها دى جامده اذا كانت هى قبلها بيومين ضاربه الجدع وطارداه من بيت أمها هتكلمه فين
خامسا المذكوره فى الواقعة انتحرت قبل كده بتاع اربع مرات مثلا منهم مرة انا اللى مبلغ الإسعاف بنفسى
سادسا تزوجت العام الماضى على ما أتذكر انها متجوزة من سنتين على الأقل
وأخيرا الحمد لله بعد حادثة الانتحار دى لم يعد اسم بيتنا بيت المجانين وتحول الى بيت القتلى

أخطب ليه هو انا اهبل ؟

اخويا الكبير بيقول انى لما هتخرج واشتغل والجنيه هيجرى فى ايدى هعمل زيه واروح اخطب، العيله دى مش عارفانى خالص
الحقيقة انا عندى اعتراضات قوية جدا على فكرة الخطوبة والجواز
تعالوا ناخدها من الأول بعد ما اهل العروسة يوافقوا عليك يبقى لازم تنزل زى المقطف تشترى شبكة وجرام الدهب عيار 21 عامل 137 جنيه ، شوف هتجيب شبكه كام جرام واحسبها لوحدك ، وده طبعا اول تأمين للعروسه من شرك عشان لو سبتها تبقى طلعت منك بحاجه.

تانى مشكله هتبدأ بعد الخطوبة على طول لازم تتحمل واجبات الخطوبة والتى تتلخص فى زيارة اسبوعية على الأقل لمنزل الخطيبة وهدايا فى عيد ميلادها وفى المناسبات وبعد ما كنت مستحمل اهلك بالعافية لازم كمان تستحمل أهل خطيبتك وانت مبتسم اللهم لا قهر.

نتكلم بقى على عش الزوجيه السعيد عندك شقة ولا لأ ده سؤال غلط السؤال الصح عندك شقة متشطبة ولا لأ ونظرا لأفضال احمد عز وباقى افراد الحكومة الميمونة فأسعار الشقق والتشطيبات فى الطالع على طول خد بالك لازم الشقة تعجب العروسة والصراحة حقها لكن المشكله ان لازم الشقة كمان تعجب أهلها يعنى من الأخر انت بتتجوز العروسة وأهلها كمان والله حاجة تفرح.

الحمد لله جبت الشقة وشطبتها لأ ماتخدش نفسك لسه الأثاث يا بابا دفعت دم قلبك فى الشقة واحنا مالنا لازم تشارك فى تأثيث البيت وتبدأ المفاوضات التى تم اجراءها من قبل حوالين العريس يجيب ايه والعروسه عليها ايه والستاير على مين ومعلهش احنا مش هنجيب سجاد وظيطه .

وبعد كده الفرح وكَُع كام الف تانيين هو الجواز بالساهل.

شكلك كده افتكرت انها خلصت تبقى لسه صغير يعنى معقول ياراجل يا محترم ياللى رايح تتجوز هتاخد هدومك القديمة معاك مايصحش لازم تنزل قبل الفرح تشترى كام طقم جداد وكام طقم ملابس داخليه وده الاهم طبعا.

وبعد ده كله ابقى قابلنى لو كان فيك نفس تعمل حاجة ليلة الدخلة

عن نفسى أتكلم

أخيرا قررت اتكلم عن نفسى وده كان الهدف الأساسى من عمل هذه المدونه أولا انا مصطفى محمود راتب طالب فى كلية الهندسة فى سنة رابعة اتصالات بمتحن حاليا وربنا يستر سقط مرتين قبل كده فى تانيه وتالته اتصالات لا احب الحكومه وامقت الحزب الوطنى بحب الكلام زى عينيا ومابحتفظش بأى اسرار لأى حد اصحابى قليلين وفى تناقص مستمر مش فاضل غير 5 تقريبا وبحاول اخلص منهم عندى وسواس قهرى ومش واثق فى نفسى خالص بحب القراءة جدا جدا وبحب الأفلام الحلوة -خريف ادم , المواطن كين , جنة الشياطين , باب الحديد ,......- وكده يعنى ودانى مليانه شمع وسمعى بدأ يضعف وعايش تماما فى عالم وهمى مفصول عن عالمنا الحقيقى ومسلى جدا وتمكنت مؤخرا من السيطره على نفسى قليلا بحيث لم اعد اضحك او ابكى فى الشارع بدون سبب مفهوم بحب الرياضه جدا الرياضه اللى هى الجبر والهندسه والتفاضل والتكامل وبحب البرمجه رغم انى ماظهرتليش كرامة حتى الآن الا ان احمد هشام بيقول انى انفع بس كده ولا كده حتى لو احمد هشام بيضحك عليا مش فارقة كتير ابويا مات يوم 25 -5 - 2005 يوم تعديل المادة 76 من الدستور ومن يومها وانا يتيم وابويا يتيم من عهد عبد الناصر واهو كلنا فى البلد دى ايتام ولاد ايتام

انه لايفكر ولكنه يستفكر بمؤخرته

لا مكان للأفعال البسيطه حين الكلام عن هذا الصديق ان كل شئ بالنسبه له محاكاه وليس بحقيقى فهو يتذاكى ويستمشى وربما يتناوم ايضا دون نوم حقيقى.
ان صديقنا يشبه رجل اعمى قرر ان يمشى فى الشارع وحيدا فسقط فى اول حفره صادفته فاحس انه اعمى لكنه واصل المشى فوقع مرة ثانيه وثالثه الى ان اقنع نفسع بأن المشى عبارة عن سقوط متكرر فاصبحت الدنيا مكان أفضل بعد ذلك.
ولكن بدات مشكلته حينما عرف اناس يتجنبون الحفر فوضع ثابتا بانه مبصر وقاس عليه فوجدهم جميعا لا يبصرون.
وبذلك اختلفت معانى معظم الأشياء فالتفكير بالنسبة له لم يعد لتحليل المشكله بقدر ماهو للزود عن قدرة ابصاره وعدم التشكيك فيها فحين تقول ان شيخ الطريقة كاذب هذا يعنى بأنه كان اعمى حين اتبعه وكذلك حين تقول ان رواية جورج اورويل اسمها 1984 وليس 1948 فهو يدافع بنفس الحماس والاخلاص عن القضيتين وعن كل قضية يتناقش فيها حتى وان دافع عن الشئ ونقيضه انها قضيه محسومه "كيف يثبت الشئ ونقيضه اننى مبصر اذن ليس هناك تناقض".
انها فى النهاية قضية واحده بالنسبة له انا مبصر رغم انفهم جميعا

انه يفكر بمؤخرته

كنا ثلاثة و كان رابعنا.

بدأ النقاش.

موضوع النقاش لا يهمنا الأن. و لن نلتفت لأراء من قالوا انه "حافظ مش فاهم". فمن المؤكد ان ابداعاته الفكرية لم يسبقه اليها أحد. و من المؤكد أن أحداً لم يكن ليحفظ مثل هذه الأراء عن غيره. و الأهم أن أحداً غيره لم يكن ليجرؤ على التفوه بها، علناً على الأقل.

لأسباب مجهولة (تحديداً هي العزة بالإثم)، أصر صاحبنا على أن قول شيء و فعل عكسه ليس كذباً. بعدها أصر أن الإسلام أباح الكذب في السياسة، رغم أن الكاذب الذي نتناقش حوله (يعتبر) شيخ طريقة.

عنده قدرة غريبة على ألا يسمع إلا نفسه. و لهذا السبب تحول الموقف سريعاً إلى نقاش حول قدراته العقلية و حول مطاطية ضميره. و عندها حدث شيء غريب:

رغم التناقض و البلاهة الواضحين في كل ما قال، إلا أن أغلب المتناقشين أجمعوا على أنه مقتنع بكل ما قاله.

كله.

الشيء و عكسه

و خلال جملة واحدة.

المجد لجورج أورويل و روايته الخالدة 1984.

لقد قامت "الطريقة" التي انضم اليها بدور الأخ الأكبر.

المجد لهذا البلوج!! فالحقيقة أنني لم ألاحظ هذه الحقيقة إلا عندما كتبت الجملة السابقة.

نحن نعرف أن "الطريقة" لم تحفظه ما قال. فهم أذكى من ذلك. فيبقى تفسير واحد: أنه هو الذي فكر و أبدع كل ما قال. و يبقى تفسير واحد:

انه يفكر بمؤخرته.

فى سنة 2050

فى سنة 2050 كان قاعد راجل عجوووز مع عيل صغير وبيقوله يابنى انتو شفتو حاجه دا ايام الخير كانت ايامنا ده على ايامى كان الواحد ينزل بالخمسه جنيه يشترى بيضه وسميطه ويتبقى معاه نص جنيه يجيب بيه لبانه

شد الحزام على وسطك

شد الحزام على وسطك غيره مايفيدك
لابد عن يوم برضه ويعدلها سيدك
إن كان شيل الحمول على ظهرك يكيدك
أهون عليك ياحر من مدت إيدك

ماتيالله بينا انت وياه ونستعين ع الشقا بالله
واهو اللى فيه القسمه طلناه واللى مايجيش انشا لله ما جاء
مادام بنلقى عيش وغموس يهمك ايه تفضل موحوس
ماتحط راسك بين الرؤوس لا تقوللي لا خيار ولافقوس

حقولك ايه واعيد لك ايه كله له آخر
دى خبطة جامدة وجت على عينك ياتاجر
يا وحستك دلوقت لاوارد ولاصادر
يحلها الفين حلال ربك قادر

قل لي في عرض النبي ياحسين رايحين نلاقيها منين ومنين
والاش متجوز اثنين يادنيا غوري جاتك البين
شوفوا البخيل يفضل منحوس ولو علقوا على بابه فانوس

فلوس دي ايه سكت ياجاموس هيه السعادة في غنا النفوس

قرب شيلني شيل لا تقوللي كتير وقليل
عمر الشدة ماتطول بكرة نهيص زى الأول
هيلا هيلا هيلا هيلا هيلا ليصه هيلا ليصه

الهكسوس : أطروحة تاريخية

حسب كلام المؤرخ القديم مانيتون ان الهكسوس كانوا يطمعون فى محو الشعب المصرى من الوجود وكانوا كفارا مشركين حتى انه وصف احتلالهم بقوله لقد نزلت بنا صاعقة من غضب الله فتجرأ قوم من اصل وضيع على غزو بلادنا وكان مجيئهم أمرا مفاجئا وسارو فى معاملة الناس بوحشية وأحرقوا المدن
لكن بنظرة بسيطة على التواريخ نجد ان الهكسوس احتلوا مصر عام 1789 ق.م وخرجوا منها مع تأسيس أحمس للدوله الحديثه عام 1550 ق.م يعنى حوالى 240 سنة لم يستطيعوا خلالها محو الشعب المصرى اما المعلومه الأكثر غرابة هى أن الهكسوس أرادوا التشبه بالمصريين فى كل شئ ليكسبوا ودهم حاليا المفروض انى اصدق ان الهكسوس ساروا فى معاملة الناس بوحشية وارادوا كسب ودهم وكانو يريدون محوهم لمدة 240 سنة ـ
من هذا المنطلق انا اشكك اصلا فى رواية مانيتون عن محاولة محو المصريين وكذلك فى محاولات التشبه بالمصريين لمدة 240 سنة لننتقل الأن للنقطة الأكثر شهرة فى موضوع الهكسوس الرساله التى ارسلها الملك ابوفيس للملك سقنن رع حاكم طيبة يطلب منه اسكات افراس النهر فى طيبة لأنها تقلق منامه فى أواريس وهذه الرسالة منافية للمنطق من عدة وجوه أولا الرسالة ليست استفزازية على الاطلاق لا تحتوى على اى اهانة لطيبة او لملكها - ربما بها مدح ايضا - فهى يمكن اعتبارها رسالة تهديدية فمعنى ذلك انه فى حالة ارسال هذه الرساله ان الهكسوس كانوا يستعدون لحرب مع طيبة لكن ماحدث هو العكس طيبة دخلت الحرب ضد الهكسوس ثانيا الرساله تحمل اهانه لملك الهكسوس نفسه حيث انها تشير بوضوح الى انه غير آمن من أذى افراس النهر فى طيبه وهو فى اواريس
أغلب الأراء تقول بأن موسى عليه السلام نشأ فى عهد رمسيس الثانى وان اختلفوا الى أى فرعون ارسل بالدعوة وقد تولى رمسيس الثانى الحكم عام 1279 ق.م. وتشير التوراه الى ان موسى جاء بعد ابراهيم عليه السلام بما يقرب 500 عام بحسبة بسيطة يتبين ان سيدنا ابراهيم جاء مع بداية غزو الهكسوس وبعده ب 500 سنه جاء موسى عليه السلام حوالى نصف هذه ال 500 سنة كان الهكسوس موجودين فى مصر ومن الواضح ان يوسف عليه السلام كان أقرب لإبراهيم منه لموسى وهو مايرجح ان قصة يوسف عليه السلام كانت مع الهكسوس وليس الفراعنه وبمراجعة قصة سيدنا يوسف وتحليلها سياسيا سوف تجد ان كل الأقاويل المذكوره اعلاه منطقيه ومبرره لأقصى مدى
أولا عند اتهام امرأة العزيز ليوسف لم يعاقب يوسف على الفور على اساس انه عبد وهى زوجة عزيز مصر على العكس سمحوا ليوسف يدافع عن نفسه ولما عجزوا عن الحكم استشاروا وثبتت براءة يوسف دون اى محاوله من عزيز مصر لتلفيق التهمة ليوسف
ثانيا رؤيا الملك
(وَقَالَ الْمَلِكُ إِنِّي أَرَى سَبْعَ بَقَرَاتٍ سِمَانٍ يَأْكُلُهُنَّ سَبْعٌ عِجَافٌ وَسَبْعَ سُنبُلاَتٍ خُضْرٍ وَأُخَرَ يَابِسَاتٍ يَا أَيُّهَا الْمَلأُ أَفْتُونِي فِي رُؤْيَايَ إِن كُنتُمْ لِلرُّؤْيَا تَعْبُرُونَ)
وكان تفسيرها أن مصر ستمر عليها سبع سنوات مخصبة تجود فيها الأرض بالغلات. وعلى المصريين ألا يسرفوا في هذه السنوات السبع. لأن وراءها سبع سنوات مجدبة ستأكل ما يخزنه المصريون،
يعنى ببساطة الملك - ملك مصر - شايل هم الناس وبيحلملهم
ثالثا الملك سأل على يوسف ولما تأكد من علمه وبراءته وعدم تهافته على الملك عينه مستشار للملك
رابعا لما جاءت سنين المجاعة اهتم الهكسوس جدا بإطعام الناس
خامسا ان اخوة يوسف اتوا ليحصلوا على حصه من الطعام ومن المنطقى ان يوسف واخوته كانوا من فلسطين وليس مصر وهو مايعنى ان الهكسوس كانوا بيساعدوا الشعوب المجاورة وفاتحين المعبر
ومن كل ما سبق يتضح كيف ان الهكسوس كانوا مخربين يشيعون الفوضى لا يتخذون المنابر الشرعية للاعتراض على الحكم الفرعونى يدعون الناس للاضراب غير حريصين عل امن البلد .......الخ

إضراب 6 أبريل

دلائل نجاح محاولة الإضراب
1. انتشار الأمن المركزى من إسكندرية لأسوان
2. عدم ظهور أى مسئول حكومى لمدة يومين فى التليفزيون
3. سيولة حركة المرور خلال يوم الإضراب

مظاهر النجاح فى محاولة الاضراب فى 6 ابريل
1.رئيس الوزراء-فى واقعة غير مسبوقة- يتكلم بمنتهى الأدب مع أبناء الشعب المصرى بالتحديد عمال غزل المحله
2. صرف شهر مكافأه لعمال المحله و 15 يوم لكل عمال الغزل
3. نزول أسعار مجموعة من السلع المهمة على رأسها الدقيق الكيلو كان ب 4.5 جنيه حاليا أصبح ب 3.25 جنيه

فوائد أخرى لإضراب 6 أبريل
1. سقوط آخر ورقة توت تغطى جسد أحزاب المعارضة المصرية العارى
2. ظهر بوضوح عدم وجود رجال فى جماعةالإخوان المسلمين -الإخوان مافهمش راجل
3. شعور الشعب برجولته أمام الحكومة

شادر البطيخ

محاولة لشرح هيكل العملية التعليمية فى مصر وتأثيرها على مختلف أنواع الطلبة
فى البداية يجب ان نتفق على ان الطفل المصرى مثل أى طفل فى العالم يولد على شكل انسان طبيعى من الداخل ومن الخارج لكن لو حاولنا تصوير التعليم فى مصر ستجده أشبه بماسورة دائرية أصغر من حجم الطفل منذ البداية يبدأ الطفل فى الدخول فيها وهو منحنى قليلا كى يستطيع الحركة دون صدمات بعدها مثل اى كائن آخر يحاول هذا الطفل النمو لكن نظرا لأن الماسورة ثابته القطر -ربما يتناقص أيضا- يصبح النمو بالنسبة للطالب حركة من مكان الى أخر وبالطبع أسهل حركة موجودة هى الدحرجة ويبدأ الطالب فى الدحرجة حتى يتحول فى داخل الماسورة الى بطيخة وليس كرة لأن الماسورة ليست منتظمة لكن هناك بعض الحالات الفردية التى ترفض الدحرجة وتحاول ان تتحرك على ايديها ورجليها داخل الماسورة وهو ما يتسبب بتحولها الى أرانب و فئران وكتاكيت فى بعض الأحيان ومشكلة هذه الكائنات ان البطيخ كعدد يتمتع بوفرة كبيرة ويتدحرج بسرعة كبيرة جدا مما يهدد بسحق الكتاكيت وبهدلة الأرانب والفئران ولهذا فان المتابع للماسورة سيجد دائما عدد من الكتاكيت القتيلة والأرانب والفئران الجريحة على جانبيها يحاولون الحركة بعيدا عن قطيع البطيخ ومع نهاية الماسورة يبدأ قطيع البطيخ فى التساقط والتفرق وعادة يتم التفرق لثلاث مجموعات 1. المجموعة الأولى تسقط من ماسورة التعليم بمصر الى ماسورة العمل وتستمر فى الدحرجة دون ان تتوقع ان هناك اساليب أخرى للحركة 2. المجوعة التانية تقع بجوار الماسورة تحاول الدحرجة خارجيا حتى تصل الى ماسورة العمل مرة أخرى 3. المجموعة التالته تقع خارج الماسورة لكن طبقتها الخارجية لا تكون بالقوة المطلوبة فتنكسر الى اشلاء بطيخة وهذه المجموعة تتدمر تماما بسقوط البطيخ الجديد فوقها
أما بالنسبة لرفقاء الدرب فإن الكتاكيت الميتة غالبا ما تنضم الى اشلاء البطيخ بعد دفعها لنهاية الماسورة او القائها من المنتصف
بالنسبة للأرانب والفئران فأنهم عادة مايصلون لنهاية الماسورة لكن غالبا لا يقعون داخل ماسورة العمل مثل بطيخ المجموعة الأولى المخدوع المحظوظ لذلك فهم يبحثون عنها لكن صدمتهم الحقيقة تحدث حينما يكتشفون ان اسلوب الحركة الأمثل داخل ماسورة العمل المصرية هو الدحرجة أيضا بعضهم يبحث عن أماكن أخرى غير اسطوانية للعمل بها والبعض يظل يقاتل داخل الماسورة حتى يجد فرصة للخروج منها ـ

أمثال شعبية

دى شوية أمثال شعبية كل واحد حر تماما يفهمها بالطريقة اللى تريحة او مايفهمهاش اصلا
1.آمنوا على مشنه مليانه عيش ولا تآمنوا على بيت مليان جيش
2. أبرد من مية طوبة
3. أبليس ما يخربش بيته
4. ابن الريس تقل ع المركب وفنا ع الخبز
5. ابن الهبلة يعيش أكتر
6. ابوك ساب لك ايه قال جدى ومات
7. اتاريك يا ضيف مانتاش صاحب محل
8. اتغربى واكدبى
9. أجرب ويسلم بالأحضان
10. ادلعى يا عوجة فى السنة السوده
11. أرقص للقرد فى دولته
12. اسمع ظراطه ولا تسمع عياطه
13. أعمل حاجتى بإيدى ولا اقول للكلب يا سيدى
14. أعمى قال لأعور كاس العمى مر قال نص الخبر عندى
15. أفتكرلك ايه يا بصله وكل عضة بدمعة
16. أقوله أغا يقوللى ولاده كام
17. أكمن ابوك جندى داير تهز وسطك
18. اللى يقول "حا" يسوق كل الحمير
19. اللى تسيبه الجدود تفنيه القرود
20. اللى سلم من الموت اتجنن
21. اللى فى ايده القلم مايكتبش نفسه شقى
22. اللى فى القلب فى القلب يا كنيسة
23. اللى فينا فينا ولو حجينا وجينا
24. اللى ماياخدنى كحل فى عينيه ما اخده صرمه فى رجلى
25. اللى ما ينفع للجنة ينفع للنار
26. اللى ماينفعك رضاه مايضركش غضبه
27. اللى ياكل الضرب مش زى اللى يعده
28. اللى يتف تفه ما يلحسهاش
29. اللى يخاف من القرد يركبه
30. اللى يربط حبل فى رقبته الف من يسحبه
31. اللى يعمل روحه ريس يجيب الريح من قرونه
32. ام قويق عملت شاعرة فى السنين الواعرة
33. انت شيخ ولا حد قال لك
34. ان درى جوزك بغيبتك كملى يومك وليلتك
35. ان رخصت اللحمة رخصت الكروش
36. ان شالله اللى خدها يندبح بيها قال ايش عرفك انها سكينة
37. ان شفت أعمى دبه وخد عشاه من عبه مانتش أرحم من ربه
38. ان صبرتم نلتم وامر ربى نافذ وان ماصبرتم كفرتم وامر ربى نافذ
39. ان عمل ولا ما عمل متعوس وخايب الأمل
40. اهى ارض سوده والطاعم الله

من كتاب الأمثال العامية لأحمد تيمور باشا

إسماعيل يطير

فى حوار مع احد الأصدقاء - اسماعيل تحديدا - حول رؤاه المستقبليه لبعض اصدقائنا المشتركين كانت ردوده كالتالى :ـ

عن نفسه قال انه سوف يعيش على الشات و........ـ
جمال طبَال فى الموالد
هانى هايقدم طلبات فى قهوة او تباع على ميكروباص يلم الأجرة
احمد السيد سيظل ماشيا فى ملكوته ولن يفكر فى العمل اصلا
كرم مهرج فى سيرك وفى اعياد الميلاد للأطفال
وليد بتاع تلات ورقات -فين السنيورة وفتح عينك تاكل ملبن - وهايكون حاطط قلم فى ودنه
مصطفى نبيل قوَاد - جمع قائد - او نصاب
محمد فرج هايتجنن ويسرح فى الشوارع
اما بالنسبة لى انا شخصيا فاسماعيل يرانى كبائع فى المواصلات العامة والفلوس هتتسرق والحاجة هتقع منى والناس تعد تلمهالى

ما قاله علماء بخارى لأميرهم

إن التاريخ يذكر لنا أن علماء بخارى قالوا لأميرهم فى القرن الماضى -1875 - إنه ليس بحاجة إلى علوم حديثة ولا أسلحة حديثة وأنه يكفيه أن يرددوا آيات من الذكر الحكيم ثم يوجهوا انفاسهم فى اتجاه العدو الذى هو جيش قيصر روسيا فينصرهم الله على اعدائهم الكفار.
ولم يستطع ان يقاوم أمير بخارى ضغوط { المؤمنين } الذين يرفضون المقارنه بين قدرة ايات القرآن الكريم وقدرات سلاح الأعداء الكفار. وكانت النتيجة ان سقطت بخارى وهى مدينة فى ازبكستان إحدى جمهوريات الإتحاد السوفييتى السابق.
إن تطبيق الشريعة امر لا يرفضه أحد . لكن يظل بعد ذلك السؤال الملح قائما . أين العقل الذى تستخدمونه وتواجهون به قضايا التحديث والتحدى الحضارى وثورة التكنولوجيا وتخزين المعلومات والسيطره على ابعاد مكانية وزمانية على اتساع الكون كله

من كتاب أزمة الإسلام مع السياسة -- فتحى غانم

ابو دقن عيرة

للاسف انا شخص كسول جدا لدرجة انى انضميت للحزب الفهيم العيسوى فطبعا بكسل دايما احلق دقنى لحد ما تطول شوية بتاع اسبوعين مثلا وبعد كده احلقها لكن فى مرة ودقنى طويلة كده جتلى نوبة تدين من اللى بتيجى قبل الامتحانات دى وقلت اطلق اللحية واهى منها سنة بردو حلقت الشارب وابقيت على اللحية منفرده وبدأ السحر اركب الاتوبيس الكمسرى يكلمنى بمنتهى الأدب مع اللقب اللى اكتسبته مع الدقن اتفضل يا شيخ لو سمحت يا شيخ تحس فى الاخوة الملتحين التانيين بيبصولك نظرة مودة انا عموما لما بركب اى وسيلة مواصلات واقعد جنب شباك ببص على اى حاجة برا وماخدش بالى من اى حاجة جوا الاتوبيس او الميكروباص وده كان بيعمللى مشاكل لما ست كبيرة او راجل كبير يقفوا جنبى وانا ما اقوملهمش كانوا بيفتكروا انى بستهبل ويبدأ كل واحد يقول موشح عن فساد الشباب والبلد اللى مافيهاش خير لكن من ساعة الدقن واتغير الوضع جدا بمنتهى الرقة والادب لو سمحت ياعم الشيخ ممكن فى ست كبيرة عايزة تقعد ولما اقوم الاتوبيس كله يعتذرلى معلهش يا عم الشيخ بس ماكنتش قادرة تقف يبقى معنى كده ايه ان الدقن بتبعد عنك سوء الظن بس الحكاية مش كلها مميزات كده فيها عيوب بردو اتنين اصحابى ولد وبنت طلعوا عينى ان تربية الدقن خطر والحكومة ممكن تقبض عليك -- خد بالك اوعى تنسى بطاقتك -- احلق دقنك عشان تخلص من القلق ده -- كده ممكن مايدخلكش الكلية
ليه كده يا جماعة ما الملتحين ماليين البلد والحكومة مابتكلمهمش ثم انا شكلى سلفى ودول مابيدايقوش الحكومة ثم مانا فى الشارع ليل نهار عمر ما حد قاللى هات بطاقتك جوه القاهرة وامن الكلية عمره ما منعنى سواء معايا كارنيه او لأ مربى دقنى او لأ وهما يعدوا يكرروا نفس الكلام كل مايشوفونى انا شكيت ان ممكن تكون الحكومة مصلطاهم علينا نحن ذوى اللحى
لكن الضربة القاصمة اللى حلقت دقنى بعديها لما كنت راجع البيت فى يوم الساعة 4 فجرا فى يناير 2008 درجة الحرارة تقريبا صفر يمكن اقل ماشى فى الشارع لوحدى لقيت واحد مبتسم ابتسامة غريبة وقاللى هات بريزة ومنظره مش منظر شحات ولا بلطجى قلتله عايزها ليه فكان الرد " أى حاجة بركة منك " ـ

عن بداية الاشتغالات

الموضوع ده كان جزء من موضوع امثال عربية بس لما لقيته طويل اوى حطيته لوحده بالاضافة لأن باقى الأمثال كان مهم فيها المثل بينما ده المهم فيه القصة او للدقة الاشتغالة

بيقولك ياسيدى ان أربع اخوات اختلفوا فى توزيع الميراث بعد ما مات ابوهم وكان ابوهم موصيهم انهم لو اختلفوا يروحوا لواحد اسمه الأفعى الجرهمى يحكم بينهم المهم طلعوا الأربعة مع بعض فى الطريق للراجل ده عدوا على مرعى فقالوا ده فى جمل كان بيرعى هنا وبعد كده الأول قال بس الجمل ده كان أعور والتانى قال ده كمان كان اعرج والتالت أضاف انه كان من غير ذيل وبعد كده الرابع راح قايلهم ان الجمل ده بيسرح وهو ماشى بعديها بشوية قابلهم راجل سألهم ماشفتوش الجمل بتاعى راحوا سألينه الجمل بتاعك أعور قالهم أيوه طيب الجمل بتاعك أعرج راح قايلهم ايوه طب ياعم الجمل بتاعك مالوش ديل رد صاحبنا بالظبط راحوا سألينه بقى أخر سؤال الجمل بتاعك بيسرح رد الراجل ايوه راحوا قايلنله ماشفناهوش - اشتغاله على حق يعنى - المهم راجل ياعينى اتجنن ومسك فيهم وخدهم لكبير قومه اللى هو مين؟ الأفعى الجرهمى اللى هما رايحلنله الأفعى سألهم طب انتوا ازاى عرفتوا الحاجات دى رد الأول قاله لقيته بيرعى ناحية وسايب الناحية التانيه فعرفت انه أعور اما التانى فقال انى لقيت رجل سايبه اثر سليم والتانيه لأ فعرفت انه اعرج التالت بقى عرف من اجتماع البعر لأن لو فى ذيل كان البعر اتفرق والرابع عرف انه بيسرح لما لقى الجمل بيسيب الحته اللى مليانه اكل ويروح للحته الفقيرة اللى مافيهاش المهم الراجل الأفعى مشى صاحب الجمل وقالوله على حكايتهم فاستضافهم يوم وجابلهم اكل وخمره وظبطهم - كل ده قبل الإسلام بكتير قوى- بعد كده يسألهم على رايهم فى الأكل رد الأولانى الشاة جميلة لولا انها رضعت من كلبة واضاف التانى وانبيذ رائع لولا انه نبت على تربة وجه التالت وابدع وقال والمضيف كريم لولا انه مابينسبش لأباه وكمل الرابع بعد ماتفقع من اخواته والكلام ده جميل قوى ومفيش احسن من كده نقوله لراجل احنا محتاجين منه حاجة صاحبنا الأفعى جتله لوثه راح سال على الشاه لقى فعلا رضعت من كلبه والخمر من كرمة على قبر ابوه اللى مطلعش ابوه لأن حسب كلام امه انه ماكانش بيخلف فخافت الملك يضيع من ايدها فعملت عملتها الراجل راح مقسم عليهم التركة ومشاهم - اما ده كله من وليمة واحدة طب لو قعدهم اسبوع- وقال كلمته المشهورة ان العصا من العصية يعنى ان العيال دول طالعين لأبوهم اللى هو كان يعرفه اللى غايظنى بقى بجد ان الكتاب مقالش هما عرفوا الحاجات التانيه دى ازاى