دفاعا عن الاعلام التحريضى فى مصر

وانا صغير كان كل العيال بتضربنى لما كنت انضرب كنت اتكسف اقول لحد ولما اشوف اللى ضربنى استخبى عشان ماضربش تانى لكن المشكله كانت بتحصل لما عيل واطى يروح يقول لاخواتى الكبار الحقوا اخوكم بينضرب فكان ييجوا جرى

مش عشان ينقذونى لكن عشان يضربوا اللى ضربنى وبعد كده يعدوا يهزقوا فيا ويشتمونى

المشكله اللى ضربنى المره دى ضربنى فى السودان وسافر بعدها على الجزاير وانا بقيت غبى قاعد طول النهار فى التليفزيون اقول انى انضربت واخواتى واقفين محاصرين السفارة الجزائرية

بلاش شعارات بقى ابوس ايدكم

هى المصيبة كلها فى الشعارات لو حذفناها هنقدر نشوف

شيل الشعارات وفكر اولا هوضح كل الشعارات اللى مش مطلوبة خالص

1. كرامة مصر فوق كل شئ

2. العرب اشقاء واخوة

3. المصريين شعب متحضر

4. الجزائر شعب همجى

5. المصريين شعب همجى

6. الجزائر شعب متحضر

مش مهم اننا ساعدنا الجزاير او ان الجزاير ساعدتنا كل ده كلام فارغ بجد وهو اوسخ كلام فى الموضوع

يعنى لو حد ساعدك يضربك هما اشترونا بالكام عيل اللى جم حاربوا ولا احنا اشتريناهم سيبكم من الهبل ده كله

لو قلنا ان الجزاير مسلمين زينا فالاسلام مقالكش انضرب من اخوك المسلم واسكت خلاص انتهينا من كل القصص دى نتكلم بقى

اول حاجة مجموعة تساؤلات

هى ايه الجريمة مين المصابين فيه كام مصاب اصابتهم عامله ازاى ؟؟

حسب القانون المصرى لو هيتعالج فى اقل من 21 يوم تبقى مش جنايه ولا تستحق تدخل السلطات

لو حد اصيب بعاهه مستديمة او انقتل او حاجة زى كده لازم يحصل تحقيق ونختصم الفيفا والسودان والجزائر عشان التلاته مسئولين

طبعا لو مفيش جهة نقدر نشتكى لها ونكون واثقين فى نزاهتها يبقى دى مصيبه اكبر بكتير من حوادث شغب بعد ماتش والمفروض اننا ننسحب من اى تجمع او منظمة مانقدرش ناخد فيها حقنا بشكل قانونى

لو عندكم تلعبوا كورة وتتظلموا مش مشكله يبقى تتكتموا وماسمعش حس اى خ.... منكم بعد كده

ده كده بالنسبة للمحور الاول ندخل بقى على الاعلام

اول حاجة الاعلام الجزائرى لا يخاطب الشعب المصرى وغير مهتم بيه ولا يؤثر على المواطن المصرى باى شكل مباشر فمالناش حق الاعتراض اصلا يعترض عليه اللى بيشتريه ولو عاجب الجزائريين هما احرار

الاعلام بتاعنا هو اللى يهمنا

دلوقتى الاعلام بتاعنا بيدعى ان الاعلام الجزائرى لسه بيهاجمنا بضراوة وده كذب فاضح

جريدة الهداف الجزائرية ناشرة مقال فى صفحتها الثالثة بعنوان العداله الالهية يتحدث بكمية كبيرة من الموده عن مصر واهل مصر

وعموما وتيرة الخلاف مع مصر قد خفت بشكل واضح

ولم يوضح الاعلام او ينوه بهذا الامر ورايى الخاص ان الاعلام ينقل لنا مايريده من الصوره وليس الصورة الكامله

المحور الثالث دولة الجزائر والرئيس بوتفليقة

الرئيس الجزائرى مازال فى حركة التصعيد ضد مصر على ما اظن - معلومات غير مؤكده مستقاه من وسائل اعلامنا الكاذبه - وهو ما يجب ان نطالب بوقفه ان كان صحيحا والمطالبه عن طريق جامعة الدول العربيه فان فشلت المطالبه فعلى الجامعه باخذ قرار مرضى لنا والا فعلينا الانسحاب من الجامعة العربيه

لو الحكومة مش هتسمع كلامنا فى الموضوع ده يبقى دى مشكله اكبر من ماتش الجزائر ونحلها الاول او نتكتم ومسمعش صوت اى خ.... تانى

ياترى مين عنده النفسيه انه يقرا كلامى ده لأخره بعيدا عن احلام الاخوة والقومية العربيه واباطيل الكرامة المصريه المهدره

لما الرسول جه كان العرب قبائل بتحارب بعض مقالهمش انتم اخوة ولازم نتحد قال لازم نقول لا اله الا الله يعنى لو اتحادنا على باطل قلته احسن

لعله خير

رغم كل الهرج اللى حصل حوالين مباراة مصر والجزائر انا شايف انها ممكن تكون بداية كويسة يعنى اقل حاجة كل واحد قال اللى فى نفسه والأهم من كده شفنا النتيجة الناس كلها شمتانه فينا بداية من اسرائيل لفرنسا لانجلترا لكل الناس فهمنا احنا قد ايه هايفين وصغيرين عشان 120 مليون بنى ادم بيعادوا بعض عشان خاطر 22 جزمه يمكن دى تكون بداية اننا نحط كل حاجة فى حجمها الحقيقى نفهم بقى ان الفراعنه ماتوا من زمان وماسابوش غير جتتهم وشوية حجارة فرجة للى رايح واللى جاى انا معرفش كتير عن الجزاير بس اكيد الداء هو الداءوطالما المرض بان يبقى مش فاضل غير علاجه

الاسبوع اللى فات كان نفسى مصر تتغلب من الجزائر عشان الناس تفهم ان عيب اوى ان فرحتهم الوحيده تبقى ماتش كوره لكن ربنا كان كريم معانا حسسنا ان الماتش ده حاجة رخيصة اوى انك تعادى عشانه اى حد

الاعلام المصرى هدى جدا بعد يوم الحد والناس سكتت والسفه قل يارب دايما على فكره سواء كسبنا او خسرنا فى السودان باذن الله الهبل خلص ومش هيحصل المهرجان الاهبل بتاع كل بطوله او على الاقل هيقل

صـلاة الـنـبــى تــمـنع ابلـيــس

هـــيـه الـــفـايـده والــــتـجـاره

ياما نـاس حـزاتها بالـكـيــس

مـاتـوا مـا نـالـوا الزيـــــــارة

طبيب الجرايح قوم الحق

وهات لى الدوا اللى يوافق

فيه ناس كتير تعرف الحق

ولجل الضرورة توافق

من الاشعار الشعبية المصرية

وَاخْتَارَ مُوسَى قَوْمَهُ سَبْعِينَ رَجُلاً لِّمِيقَاتِنَا فَلَمَّا أَخَذَتْهُمُ الرَّجْفَةُ قَالَ رَبِّ لَوْ شِئْتَ أَهْلَكْتَهُم مِّن قَبْلُ وَإِيَّايَ أَتُهْلِكُنَا بِمَا فَعَلَ السُّفَهَاء مِنَّا إِنْ هِيَ إِلاَّ فِتْنَتُكَ تُضِلُّ بِهَا مَن تَشَاء وَتَهْدِي مَن تَشَاء أَنتَ وَلِيُّنَا فَاغْفِرْ لَنَا وَارْحَمْنَا وَأَنتَ خَيْرُ الْغَافِرِينَ [الأعراف : 155]

مصنع الدلتا للصلب

الله يرحم عبد الناصر لو كان لسه عايش كان زمانه بينتحر

اهتفوا باسم الاله

بحلم اشوف حد بيحكم مصر مفيش فى اسمه كلمة مبارك

الرويبضة

قال رسول الله صلى الله عليه وسلم
سيأتي على الناس سنوات خداعات ، يصدق فيها الكاذب ، و يكذب فيها الصادق ، و يؤتمن فيها الخائن ، و يخون الأمين ، و ينطق فيها الرويبضة . قيل : و ما الرويبضة ؟ قال : الرجل التافه يتكلم في أمر العامة
الراوي: أنس بن مالك و أبو هريرة المحدث: الألباني
خلاصة الدرجة: صحيح

بس شي

عبارة كان ابويا الله يرحمه دايما يرددها عند اخباره بالعزم على اى حاجة جديدة ومعنى العبارة المهم ان تظهر اى نتيجة من اى نوع
انا زهقت بقا نفسى اعمل اى حاجة يكون لها نتييييييييجة

البنت اللى أختى جابت لها البسكويت

كانت فى بنت مع اختى فى المدرسة فى الاعدادية البنت كانت متفوقه وفى يوم فى اخر السنه بعد الناس كلها ما قعدت فى البيت عشان تذاكر محضرش من الفصل كله غير البنت دى واختى فانتهزت صاحبتنا الفرصة وقعدت تشتكى لأختى انها مش عارفة تذاكر والمواد كتيرة وصعبة وبدأت تعيط فصعبت على اختى جدا قعدت تطبطب عليها وتحاول تهديها وخدتها واشترت لها بسكويت - مكانش لسه اسمه بسكوت - وفى اخر السنه البنت طلعت الاولى على المدرسه بفرق 5 درجات عن اختى وفضلت ذكرى البسكويت تؤلم أختى كل اما تفتكرها ودخلوا كلهم ثانوى عام وبعد تلت سنين يشاء السميع العليم انهم يجتمعوا فى نفس الفصل مرة تانية فى الثانوية العامة وقرب اخر السنه بس كان الفصل مليان البنت خرجت مابين حصتين وندهت لأختى -ملحوظة : العلاقة كانت فاترة جدا مابين الحادثتين - وبدأت تشتكيلها ان المواد صعبة وطويله فاختى كانت اتعلمت الدرس قالت لها كلنا كده مش انتى بس راحت معيطه فاختى سكتت فبدأت بالنحيب واختى بردو فضلت ساكته لحد البنت لقت مفيش امل فسكتت المهم فى اخر السنه صاحبتنا دخلت صيدلة واختى دخلت علوم المشكلة ان اعدادى صيدله كانوا بياخدوا وقتها محاضرات كتير فى علوم فكل اما اختى تشوفها كانت تهرب منها - مكانتش ناقصة ذل - واختى فى سنه تالته فى علوم قابلت صديقة مشتركة فبدأت تسرد عليها اخبار الشلة القديمة وطبعا الخبر اللى يهمنا ان البنت بتاعت صيدلة اتجننت ودخلت مستشفى العباسية وبعد كده اختى اتخرجت واشتغلت فى الوزارة بتدرس كمبيوتر للمرحلة الاعدادية وانهارده اختى افتكرت القصة دى لما شافت ولد بعد لجنة الثانوية العامة بيقول انا محلتش حاجة وانا خايف وزميله بيقوله كل مرة تقول كده وفى الاخر انت اللى بتجيب الدرجة النهائية كان نفسها تفهمه ان فى الاخر مفيش فرق هى اتجننت وانا اشتغلت مدرسه نفس الوضع تقريبا وحتى لو مكانتش اتجننت كانت هتبقى ايه يا بقاله يا مندوبى مبيعات

انا قلت اعرض وجهة نظرها من باب الامانه العلمية ومحاولة للبحث عن اماكن افضل لاستغلال مجهودنا

عادل .......... إمام المنحلين

النجم عادل امام مازال يتحفنا بفحولته المتوقده من عمل الى اخر وقد قررنا استقصاء سيرة فحولته من خلال افلامه لتوثيق هذه الظاهرة الذكورية الوافده على نجمنا المحبوب وتحديد بداية انطلاقها آملين فى ان تكون نهايتها قريبة والا تكون هذه النهاية هى نهاية نجمنا سوف ندرس الظاهرة من باب الاستمرارية بمعنى انه سنؤرخ لبداية الظاهرة ببداية مجموعة الافلام التى يمارس فيها عادل الامام شبقه الجنسى غير المعتاد بشكل مستمر

تبدأ الظاهرة مع فيلم المنسى ولن ينسى احد الدور المميز للفنانه دينا واحلام عادل الامام العفيفة ثم لا يسعنا ان ننسى ايضا الممارسات البريئة بين نجمنا والنجمة يسرا التى تحملت ومازالت تتحمل الكثير

وتستمر الظاهرة فى فيلم الارهابى حيث يطلب عادل امام العلم من الممثله الصاعده فى ذلك الوقت حنان شوقى وسنلاحظ خلال متابعتنا للظاهرة مدى اهتمام عادل امام بالممثلات الصاعدات وهذه هى اخلاق النجوم

ثم ننتقل مع الظاهرة الى رساله إلى الوالى الفيلم الذى يثبت فيه عادل امام ان فحولته كانت من التاريخ وان رجال مصر لم يكن عندهم حياء على مر التاريخ -فى الحق- ـ

يمكننا الان الطيران مع طيور الظلام الفيلم الذى قالت فيه نجمتنا يسرا عبارتها الشهيرة - هو مالوش فى البوس - تقصد المحامى الملتحى وبالطبع لم تكن لتجرؤ ان تتهم عادل امام بهذه التهمة وهذا ايضا يحتوى على ممثله شابه مارس عليها عادل امام فحولته دون ان تفعل اى شئ اخر يذكر فى الفيلم

فى الجزء الاول من فيلم بخيت وعديله كان اهم تعليق لعادل امام على الاحداث اثناء الفيلم -هو احنا ليلتنا فل ولا حاجة
اما فى الجزء الثانى الجردل والكنكه فكان - هو احنا ليلتنا فل ولا حاجة
اما الجزء الثالث فكذلك - هو احنا ليلتنا فل ولا حاجة

النوم فى العسل فيلم يهتم بالفحوله عند جموع المصريين ولهذا نحن نحيى صناع الفيلم على اختيار عادل امام اكثر من دافع عن فحولته فى تاريخ السينما المصرية والعالمية ايضا

بعد هذا الفيلم تبدأ مرحلة جديدة فى حياة فحولة عادل امام الفنية مرحلة النضج والرشد والرشاد
فهذه المرحلة تتميز بان الفحولة اصبحت مسيطرة على الدراما حتى وان لم يكن هذا واضحا فى القصة الاصلية الا ان الفحولة تتضخم كوحش اسطورى يفح النار من بين شفتيه لتحرق ما سواها من الموضوعات

تبدأ المرحلة بفيلم الواد محروس بتاع الوزير وقد كانت المنافسه على اشدها فى هذا الفيلم بين عادل امام وكمال الشناوى لكن انتصر عادل امام وهو مايوضح ان النصر لا يتحقق من فيلم واحد

أمير الظلام الذى يدرك كل شئ بالتحسيس وبهذا الاسلوب ادرك عادل امام فى الفيلم الممثله شيرين سيف النصر

التجربة الدنماركية تجربة ان تخلع ملابسك كم كانت تجربة شيقة بالنسبة لعادل امام خصوصا عند ممارستها مع الممثله اللبنانية الصاعده فى ذلك الوقت نيكول سابا ويجب هنا ان نؤكد على اهتمام عادل امام بالسماح للممثلين العرب بممارسة اعمالهم الشريفة فى القاهرة

عريس من جهة امنية وهنا تظهر نار فحولة عادل امام اللافحة التى التهمت القصة الاصلية وشريف منير وحلا شيحة فى مقابل اله فرعونى قديم دعاه عادل امام فى الفيلم باله المسخرة

السفارة فى العمارة هذا الفيلم يتحدث عن المواجهة الصعبة بين الكيان الصهيونى الغاصب وفحولة عادل امام التى استغلها الاسرائيليين لكى يبيع القضية لكنه ظل متمسكا بالقضيه (فحولته) مع ممثلة ضيقة العينين بخلاف الممثلة الصاعده داليا البحيرى

عمارة يعقوبيان فيلم يقدم فيه عادل امام شخصية عجوز متصابى وللعجب كان اقل افلام عادل امام فحولة ولنا ان نسأله عن سر غياب فحولته عن هذا الفيلم

مرجان احمد مرجان ... بوس الواوا الملابس الداخلية اللى انتى لابساها من مصانع مرجان

بوبوس : يعرض حاليا فى دور العرض وندعوكم جميعا لمشاهدته على بينه مما سبق مع الاخذ فى الاعتبار حرمان عادل امام من ممارسة فحولته فى الفيلم السابق حسن ومرقص (ازدراء اديان)ــ

وبعد استقصاء هذه الظاهرة المحيرة نرجو من حضرات القراء ارائهم فى سبب سعى النجم المحبوب لتأكيد فحولته وهل الامر يتعلق ببدايته الفنية ام باشياء ابعد من ذلك وهل يفيد العلاج النفسى لعلاج الظاهرة ام نحتاج لتدخل جراحى من نوع ما ؟
اسئله حائرة نختم بها دراستنا المتواضعة آملين ان نجد لها اجابات في الايام والشهور القادمة