Tuesday, December 11, 2007

أمثال عربية

إن الموصين بنو سهوان
يعنى الناس اللى بيوصوا كتير اكتر ناس بينسوا اللى وصوا بيه

إن البغاث بأرضنا يستنسر
البغاث ده طائر ضعيف قوى ملطشه يعنى ييجى علينا احنا ويشد حيله ويعمل روحه نسر

إن المعاذير يشوبها الكذب
طبعا فكر فى اللى بيقوله اصحابك لما بييجوامتأخرين أو فى اللى انت بتقوله لم بتييجى متأخر

إن وراء الأكمة ما وراءها
دى بقى حكاية لوحديها بيقولك يا سيدى كان فى جاريه مديه لواحد صاحبها معاد ورا الأكمة دى بعد كده أهل البيت
هروها شغل فى اليوم ده وبقى الجدع ملطوع وهى مش عارفة تروحله لحد ما زهقت راحت قايلالهم ارحمونى بقى دى الأكمة وراها اللى وراها

إن السلامة منها ترك مافيها
دى مصر

إنى لآكل الرأس وانا أعلم ما فيه
يعنى انا داخل على المصيبة دى وانا عارف ايه اللى هيحصلى

أنف فى السماء واست فى الماء
دول الناس اللى واخدين فى نفسهم ألم وهما حمير مناخيره فى السما وحتة تانية فى الميه

ان كنت بى تشد أزرك فأرخه
يعنى لو معتمد عليا فانت معتمد على حيطة مايلة

أنت كالمصطاد باسته
يعنى العملية سهله ده انت لو مديت ....... هتصطاد

إنما يجزى الفتى ليس الجمل
يقصد انك ماتنتظرش الجزاء من حد مابيفهمش ماحدش هايقدرك صح غير اللى بيفهم

إن يبغ عليك قومك لا يبغ عليك القمر
افهمها زى مانت عاوز

إذا سأل الحف وإذا سئل سوف
اه الأشخاص المملين دول ماتطلعش منه بمصلحة أبدا ومع ذلك مطلع عينك بطلباته

أى فتى قتله الدخان
بيقولك يا سيدى ان فى راجل اتخنق من الدخان ومات فقعدت مراته تندب عليه وتقول اى فتى قتله الدخان يعنى الدخان قتل راجل جامد مش اى راجل يعنى لحد ما عدا عليها راجل كبارة كده وقالها لو كان ذا حيلة لتحول يعنى لو كان بيفهم كان ايه اللى قعده فى الدخان لحد اما مات فبقت بتتقال على قلالاة الحيلة

أكل لحمى ولا أدعه لآكل
حاجة زى بيدى لا بيد عمرو

أنت اعلم ام من غص بها
يعنى انت هتعرف اكتر ولا اللى لقمة وقفت فى زورة بتتقال للى بيفتى

إذا كان لك أكثرى فتجاف لى عن أيسرى
يعنى انت شايف فيا مميزات كتير ماتدقليش على غلطات بسيطة

أبى يغزو وأمى تحدث
بيقولوا ان فى راجل رجع من الغزو فجت الناس تزوره فخرجت لهم مراته وقعدت تحكى عن بطولاته وانجازاته فابنهم شاف المنظر كده راح قايل الكلمة دى

أنا دون هذا وفوق ما فى نفسك
سيدنا الإمام على بن ابى طالب -كرم الله وجهه- واحد قعد ينافقه راح رادد عليه الرد ده انا اقل من اللى انت قلته بس انا احسن من اللى فى دماغك

إياك وأن يضر لسانك عنقك
مفهومة دايما اتكلم فى حدود المتاح

أمر فاتك فارتحل شاتك
يعنى خلاص حاجة عدت ماتقرفش اهلى بيها وفكك منى وخد شاتك واخلع من هنا وبلاش نقلب فى القديم

ابلى لم ابع ولم اهب
يعنى جمالى لا بعتها ولا هاديت بيها بتتحكم فيها ليه

أن أصبح عند رأس الأمر أحب إلى من أن أصبح عند ذنبه
انا احب اكون عند راس الموضوع مش ابقى عبيط الليلة وناس تانية ممشيانى


كل ده من مجمع الأمثال : الميدانى


2 comments:

Rateb said...

يا جماعة عبرونى اى حد يبعت اى تعليق حسسونى ان فى حد بيدخل

Faheem said...

يا ريت يا بابا راتب تحكيلنا حدوتة الراجل اللي ضحك على الناس اللي كانوا فاكرين انه فيه واحد ميت عندهم و بعدين قام هو قالهم علشان تتأكدوا انه مات لازم تعملوا حاجة
......