Tuesday, February 12, 2008

ابو دقن عيرة

للاسف انا شخص كسول جدا لدرجة انى انضميت للحزب الفهيم العيسوى فطبعا بكسل دايما احلق دقنى لحد ما تطول شوية بتاع اسبوعين مثلا وبعد كده احلقها لكن فى مرة ودقنى طويلة كده جتلى نوبة تدين من اللى بتيجى قبل الامتحانات دى وقلت اطلق اللحية واهى منها سنة بردو حلقت الشارب وابقيت على اللحية منفرده وبدأ السحر اركب الاتوبيس الكمسرى يكلمنى بمنتهى الأدب مع اللقب اللى اكتسبته مع الدقن اتفضل يا شيخ لو سمحت يا شيخ تحس فى الاخوة الملتحين التانيين بيبصولك نظرة مودة انا عموما لما بركب اى وسيلة مواصلات واقعد جنب شباك ببص على اى حاجة برا وماخدش بالى من اى حاجة جوا الاتوبيس او الميكروباص وده كان بيعمللى مشاكل لما ست كبيرة او راجل كبير يقفوا جنبى وانا ما اقوملهمش كانوا بيفتكروا انى بستهبل ويبدأ كل واحد يقول موشح عن فساد الشباب والبلد اللى مافيهاش خير لكن من ساعة الدقن واتغير الوضع جدا بمنتهى الرقة والادب لو سمحت ياعم الشيخ ممكن فى ست كبيرة عايزة تقعد ولما اقوم الاتوبيس كله يعتذرلى معلهش يا عم الشيخ بس ماكنتش قادرة تقف يبقى معنى كده ايه ان الدقن بتبعد عنك سوء الظن بس الحكاية مش كلها مميزات كده فيها عيوب بردو اتنين اصحابى ولد وبنت طلعوا عينى ان تربية الدقن خطر والحكومة ممكن تقبض عليك -- خد بالك اوعى تنسى بطاقتك -- احلق دقنك عشان تخلص من القلق ده -- كده ممكن مايدخلكش الكلية
ليه كده يا جماعة ما الملتحين ماليين البلد والحكومة مابتكلمهمش ثم انا شكلى سلفى ودول مابيدايقوش الحكومة ثم مانا فى الشارع ليل نهار عمر ما حد قاللى هات بطاقتك جوه القاهرة وامن الكلية عمره ما منعنى سواء معايا كارنيه او لأ مربى دقنى او لأ وهما يعدوا يكرروا نفس الكلام كل مايشوفونى انا شكيت ان ممكن تكون الحكومة مصلطاهم علينا نحن ذوى اللحى
لكن الضربة القاصمة اللى حلقت دقنى بعديها لما كنت راجع البيت فى يوم الساعة 4 فجرا فى يناير 2008 درجة الحرارة تقريبا صفر يمكن اقل ماشى فى الشارع لوحدى لقيت واحد مبتسم ابتسامة غريبة وقاللى هات بريزة ومنظره مش منظر شحات ولا بلطجى قلتله عايزها ليه فكان الرد " أى حاجة بركة منك " ـ

2 comments:

Muhammad said...

أنا بقى السؤال اللي فضلت أسأله لنفسي ليه بعد ما حلقت دقني الناس فضلت تقولي يا شيخ، حتى اللي بيقابلوني أول مرة...

علامة الصلاة و راحت طب ليه؟

اللطيف اني مرة كنت ماشي مع واحدة صاحبتي (بس مزة) و دقني طويلة و بدون مقدمات لقيت اللي بيلقح كلام عن ازاي الشيخ ماشي مع مش عارف مين، و ايه و ليه و ازاي؟

ساعتها اتنرفزت جدًا، انا مش شيخ، و لا أمثل إلا نفسي يا ولاد ال... طبعًا مقولتش كده لأن كان لسه معايا صاحبتي و مكانتش طالبة، رديت بنفس الطريقة المصرية العتيقة من تلقيح الكلام!!!

Unknown said...

إنت بتفكرني بالمشهد المعروف في مسرحية محمد نجم بتاعت
"أنا أركب دقن ... و أدخل علي أبوكي و أقوله أنا مش شريف"